Achchi or perfect bahu kaise bane. 10 Tips for being an ideal daugter in law.

   Agar ap ek ladki hain or bahut jald aapki shadi hone wali hai to jarur aapko ye soch ke dar lagta hoga ki sasural me jane kaise adjust karungi. Agar aap ye soch kar preshan hain to aaj main apko btata hu ki Aap ek achchi bahu kaise ban sakti hain. Ye tips apko sasural me sbka favorite bna degi. Aap beshak apne maa baap ke ghar me ek adarsh beti rahi ho lekin ek ladki  hone ke karan apko apni life ka lagbhag 66℅ time apne sasural me bitana padta hai. Or ek adarsh bahu banne ke liye aapko kafi kuch karna or dekhna padta hai.


    Halaaki ab jamana badal rha hai lekin phir bhi India me abhi bhi shadi ke baad ladki apne pati ke ghar me hi rahti hai or apne sath sath puri family ki jimmedari usi ke upar rahti hai. Aise me agar aapko sasural me sabka chaheta banna hai to btaaye gaye tips ko dhyan me rakhe.

1. Subah jaldi uthane ki habit dale-  
Agar aapko der tak sone ki aadat hai to koshish kar ki shadi se pahle aap subah jaldi uthane ki aadat dale. Kyoki aapko ye pta nahi hai ki aapki hone wali saas ka daily routine kya hai? Isliye aapko subah jaldi uthna sikhna hi pdega.

    Ye to aap sab jante hain ki saas chahe city ki ho ya gaon ki. Bahu ka der se so kar uthna kisi bhi saas ko acha nahi lagta. Iske sath hi agar aapki subah jaldi uthne ki aadat ban jayegi to ye aap ke liye acha hoga. Isse aapko fayda ye hoga ki Sasural me baki logo ke routine ke bare me bhi apko jald hi pta lag jayega or iska sabse acha asar apke married life par pdega.

2. Pati ke sath ghar ke or members ke pasand or napasand ka khyal rakhe- 
Agar apka ye sochti hain ki sasural me pati hi aapka sab kuch hai to aapko kuch mushkilo ka saamna karna pad sakta hai. Ye galat nahi ki pati hi aapka sab kuch hai lekin iske sath ghar ke har member ka kuch na kuch mahatva hai. Isliye aap ghar ke har ek member ki pasand napasand ka kyaal rakhe. Kise kya acha lagta hai or kise kya nahi acha lagta is baat ka khaas dyan rakhe.

    Bas ap soch kar dekhe agar aap or aapki saas market se sabji lene gye ho or aapki saas kisi aisi sabji ke liye kahti hain jo aapke pati ke bhai ya bahan ko nahi pasand hai. Us samay agar aap unme se kisi ka naam lekar ye Kahe ki " Mummy ji ise rahne dete hai ye Rinku ko ya Rinki ko nhi pasand. To sochiye sirf itani si baat aapki saas ke dil me kitna effect dalegi. Kyoki aksar dekha jata hai ki patni ke aa jane ke baat Maa ka dhyan us bete se jyada ghar ke or bachcho par jane lagta hai. Iska simple sa reason ye hai ki unka dhyan rakhne ke liye hi to ap ko laya jata hai. Isliye unke sath agar aap sabka thoda dhyan rakhe to aap ek ideal bahu saabit ho sakti hain.

3. Apne devar ya nanad se dostana vyavhar kare- 
Ye kuch jada hi special tips hai ☺ Dhyan rakhe ki sasural me devar or nanad ke sath apka dostana behaviour aapko saas sasur or pati ki najar me ek special bahu bna sakta hai.

    Agar aapke aas padosh me kabhi kisi saas or bahu ki ladayi huyi to payenge ki is ladayi ka kaaran pati ke bhai bahan hi hote hai. Aisa nahi hai wo ladayi ko bdhawa dete hain. Lekin ladayi ka center point wo hi hote hain kyoki saas ko yah pasand nahi aata ki uske ghar ki bahu gahr ke baki bachcho se parayo ki tarah vyavhar kare. Saas ke liye uska sansaar unka pati unke bete jisme apke pati or agr koi or bhi beta ho or unki beti or ap ho. Ek minute ke liye soch kar dekhe ki agar wo apni bahu se kisi baat par bahas krti hai to bahas isi ke beech me kisi se sambandhit hai. Or agar bahas aapse ho rahi hai to baki kaun bacha ?

    Ji haan jo baki bache unme se unke laadle hi hain. Isliye devar or nanad se aapka behavior jitna acha hoga utna aapke sasural me aapke liye pyar barsega. Or agar aapke pati ko aapke baare me kisi se koi burayi sunne ko nahi milegi to unke dil me aapke liye pyar automatic badega.

4. Kabhi pati ke sath kanafusi na kare-
Agar aap kanafusi nahi samajhte to guftagu to samajhte hi honge. Iska matlab hai ki kabhi pati ke sath is tarah se baat na kre ki agar ghar ka koi or member aapko dekhe to use ye lage ki ap koi secret baat unse chhupa rhi hain ya aapke or aapke pati ke beech me kuch pak rha hai jise aap baki ghar walo ko batana nahi chahti. Aapke or aapke pati ke beech secret sirf bedroom tak hi ho to jada acha hai agar aapki problem kuch is tarah ki hai jise aap sabke saamne share nahi kar sakti to koshish kare ki use apne husband ke sath apne bedroom me hi share kare. Jisse aisi preshani khadi na ho .Aisi pareshaniyo ke liye aap kisi ko koi dosh nahi de sakte, ye human nature hai jo natural hai or aap iske liye sirf is baat ki savadhani rakhe ki aisi kisi situation ko create hone se bachaaye.

5. Ghar  ki choti moti problems ko shuljhane me sabki help kre lekin-
Aap ek bahu ke roop me jis ghar me ja rahi hain jaahir hai ki aapko us ghar me ache or bure sb tarah ke din dekene padenge. Isliye aap yah jarur dhyan rakhe ki agar kisi ko koi chhoti moti problem ho to unse kahe ki aapse share kre. Unhe is tarh ka viswas dilaye ki ho sakta hai ki aap hi us problem ka solution nikal de nahi to thodi bahut help to kar hi sakti hai.

    Is tarah aap us family me jaldi jaldi se puri tarah ghul mil jayengi. Yaad rakhe rishte tabhi majboot bante hain jab aap kisi musibat me ek dusre ka sath dete hain.

6. Har time apne mayake ke badayi na krti rahe- 
Aapke saamne aapki koi friend kisi or friend ki badayi kre to aapko kaisa lagta hai. Beshak bura hi lagta hai kyoki thodi bahut to chalta hai lekin roj roj or har baat par aisa ho to sahan nahi hota. Aisa kuch har jagah hota hai. Kisi bhi family me ye pasand nahi kia jata ki unke ghar ki bahu bas apne maayke ki hi badayi karti rahe.

    Jahan aapne 25 ya 30 saal bitaye hain Apke mind se wahan ki yaade or baate itani jaldi nahi mitati. Or fir nayi jagah par baat karne ke liye aapke paas kuch nahi hota. Lekin agar aap baat baat me apne maayke ki hi baat lekar shuru ho jayengi to dhyan rakhiye ye achi baat nahi hogi. Har koi is baat ko pasand nahi karta. Isme kuch words ko kam use kare jaise- Mere papa Meri mummy, Mera Bhai ya Meri bahan har baat me aise used word dhire dhire pareshani khadi kar sakte hain. Aise sabdo se lagne lagta hai ki aap sasural me adjust nahi kar paa rahi or abhi bhi bas maayke ki care karti hain.

    Kuch logo ki memory itani tej hoti hai ki unhe har incident achi tarah yaad rahta hai or unke saamne aap koi bhi topic chhed de. Wo us topic par apni baat ko lekar baith jate hain or aapki nahi sunte.Agar aap bhi unhi me se hain to thoda savdhan ho jaye or apni is aadat ko thoda badalne ke koshish kare. Aap pahle saamne wale ki puri baat ko dhyan se sune uske bad hi kuch bole.

    Koshish kare ki apne pati or ghar ke baki logo se unhi ki purani baato ko sune jisse apke paas unse related topic hoga.  Aisa nahi hai ki sasural wale aapke maa baap ya aapke maayke walo ko pasand nahi karte isliye unhe unki badayi pasand nahi aati. Har chij ki limit hoti. Aap us limit tak apni baat ko rakh sakti hain. Intajar kare ki aapke maayke ka topic hi dusri side se shuru ho. Fir aap apni baat ko aasani se rakhiye. He sabse important tips hai. Is par jarur amal kare.

7. Father in law ka khaas attention apke liye faydemand-
Aapke sasur ji ka aapke sasural me sabse ahem role hota hai. Isliye koshish kare ki unke pasand napasand ka sabse jyada de. Agar wo khane pine ke sahukeen hain to ye aapke liye plus point hai. Bas unke man ki dish banayiye or ban jayiye us ghar ki sabse khaas. Par aisi dishes unke shareer ko nuksan na kare ye bhi dhyan me rakhe.

8. Bade bhai ki wife ( jethani ) se madhur sambandh-
Aap jis ghar me jaa rahi hain jaruri nahi ki bade bete ki bahu ban ke jaa rahi ho. Agar aap ghar ki dusri ya tisri bahu hain to is baat ka aapko dhyan rakhna hoga ki apki jethani ke sath aapke relation ache ho. Kyoki agar aapko unka support mil gya to aapki saari mushkile apne aap khatam.


9. Ghar ke baki achcho se mel-jol rakhe-
Ghar ke bachche ke sath mel-jol rakhe ye ghar me khusnuma mahaul taiyar karta hai or aapka najariya bhi sabko pta chalta hai. Bachche agar aapse khus rahenge to aapki tarif krenge. Iske liye aap unke sath thoda samay bitaye, agar bachche padte hain to unhe tution aadi bhi de sakti hain.

10. Fijulkharchi ki aadat or pahnawa- 
Agar aap aise ghar se hain jahan aap par is baat ki koi bandish nahi hai ki aap paise kahan or kaise kharch karti hain to ab iske liye thoda sochna shuru karde. Apni is aadat ko ap shadi ke baad sasural ki ravaiye ko dekh kar continue kar sakti hain 😊. Pahle sasural ka mahaul dekh ke samajhe ki unki finacial condition kaisi hai or kisiko is baat se koi problem to nahi.

     Waise to kapde sabko apne man ke hi pahnane chahiye jo ap par ache lage or jo aapko ache lage.Har ghar me aisi koi problem nahi hoti ki aapko kapdo ke liye roka-toki ki jaye lekin phir kuch gharo me aaj bhi Saari ya Salwar suit hi ladkiyo ya aurato ke liye pasand kiya jata hai. Agar apke sasural wale jyada modern khyalat ke hain to aap fancy dresses jaise Jeans Tees Top ya or kuch bhi pahan sakti hain. Koshish kare ki unke tradition ko dhyan me rakh kar hi kapdo ko choose kare. Kyoki kisi ki najar aap par baad me aapke kapdo par pahle jati hai and as you know 'first impression is last impression'

   In tips ko follow karke aap apni image sasural me ek adarsh or achchi bahu ki bna sakti hain. Sabke aankho ka tara banne ke liye aapko kuch chijo ka tyag bhi karna padta hai. Lekin iska matlab ye nahi ki aapko kisi ke isharo par chalna pad rha hai ya bandh ke rahna pad rha hai. Ye to ek acha sa tarika hai sabko apni or khichne ka or sasural me apni achchi image bnane ka. To mere khyal me aapko is baat ka answer mil gya hoga ki ek achchi bahu banane ke liye kya kya karna padta hai.   So happy wedding.