Songs or music ki help se English sikhne ke 7 mindblowing tips

English sikhna difficult kyo hai ? Kyoki ye language sikhne me kafee boring lagti hai. Koi bhi language sikhne me yahi hota hai. Agar iska koi entertaining trick ho to ise asaan bnaya ja sakta hai. Songs or music iske option ho sakte hain. Lekin kya gaana ga kar or music sunkar English sikha ja sakta hai ?


Ji haan bilkul ! Ye na sirf ek behtareen or purana tarika hai balki kafee entertaining or saral option bhi hai. Isase sikhne wale ke man me har baar kuch or nya sikhne ki ichcha badhegi. Lekin songs or music se English kaise sikh sakte hain ?

Shayad aapne ye pahle bhi suna ho or try kiya ho lekin aapko isme success na mili ho. aisa isliye kyoki aapko ye nahi pta ki aapko start kaise karna hai or iske important point kya hai.  Aapke liye ye rahe wo saat tips jinse aap English geet or sangeet ki help se Apni English speaking improve kar sakte hain.

Music or songs se English sikhne ke top 7 tips

Kuch bhi karne se pahle ye tay karna jaruri hota hai ki aap jo karne ja rahe hain wo sahi direction me hai ya nahi. English sikhne me songs or music aapki help tabhi kar sakte hain jab aapka selection right direction me ho. Galat direction or selection aapke andar wahi boriyat fir se paida kar sakte hain or aapka ye tarika entertaining hone ke bajay boring ho sakta hai. Ise entertaining bnane ke liye ye tips follow kariye.

1. Sahi song or music selection 

Sabse pahle baat aati hai music ki. Aapko wo song sunana hai jiska music aap enjoy karte ho. Kyoki jab tak aap music enjoy nahi karte tab tak aapka man song ke bol nahi pakad payega. Jo ki bahut hi important chij hai.

Song aisa select kare jiske bol ya shabd na to jyada difficult ho or na hi jyada easy ho balki aise words ki mixing ho jo maximum simple bolchal ke dauran use kiye jate ho.

Kuch English gaano me singer aise bol use karte hain jo do words ko mix karke bane hote hain. Wanna, gonna type ke word to samajh me aate hai lekin I'll, we're, aren't type ke word song me hote hain to pakad me nahi aate. Jis par kafee mehnat karne ke baad bhi ho sakta hai ki aapko kuch samajh na aaye. Aise words wale song ke sath kabhi learning start na kare. Jab aapko kafee kuch samajh aane lage to baad me is tarah ke song try kar sakte hain.


Shuruat karne ke liye aap aise gaane choose kare jo story se related ho ya jis gaane me story btayi ja rahi ho. Isase apko song samajhne me asaani hogi or agar aapko song samajh aa rha hai to gaane ka bol aapke mind me visualize hone lagega. Dhire dhire wahi song bina sune bhi gaa sakte hain. Aap bachcho ke English song or TV serial ke title song sun sakte hain.

2. Read and study songs

Sunane ke sath aap songs ko study karna bhi shuru kare. Isase aapko songs ke bol jaldi samajh aa jayenge. Or song ka matlab bhi samajh aane lagega. Jitne jyada word aapko samajh aayenge utni jaldi aapki English improve hogi.

Iske liye aap google par koi bhi song title lyrics ke sath written likh kar search kar sakte hain. Aapki screen par bahut si aisi website aa jayegi jis wo gaana likha hua mil jayega. Ise padhe or fir sune.

3. Video songs dekhiye

Sunane or padhne ke sath songs ko dekhna bhi start kare. Kuch words or unki meaning aapko actor ya singer ke action ko dekh kar pta chal jati hain. Jis tarah ek chhota bachcha aapke action ko dekh kar puri language sikh jata hai bikul waise hi song ke sath video dekhne par aapko 50 % sentences samajh aa jate hain.

Ab ye bahut hi asaan hai. Aap kisi bhi English song ka video Youtube par easily search kar sakte hain or online offline ya download karke dekh sakte hain.

4. Vocabulary support 

Song ke andar kisi bhi word ke samajh na aane par use apne hisab se kam chalau bnakar na gun gunaye. Har word ka matlab or meaning janane ki koshish kare. Iske liye aap Dictionary ki help le sakte hain. Apni vocabulary strong karne ke jitne jyada chances aapko mile use chhode nahi. Balki uska pura fayda lijiye. Vocabulary support ko aap ek scaffolding ( Machaan ) ki tarah use kare.

Scaffolding wo hota hai jiski help kisi makan bnane ke liye supprt ke roop me li jati hai or kaam hone par hata di ja sakti hai. Bas aapko bhi ise temperory use ke liye hi rakhna hai. Start karne ke liye ye bahut jaruri hai.

5. Start singing loudly

Jab aapko songs samajh me aane lage use loudly gaana start kariye. Ye jaruri nahi ki aapke andar singing ka talent ho. Ya sunane ke liye audiance ho. Agar aap kisi ke samne gaane me shame feel karte hain to akele me gaane ki practice kar sakte hain.

Yaad rakhiye ki aapko loudly gaana hai jisase aapke bol me kahan mistake ho rahi hai aapko pta chal sake.

Aap ek band room me apna koi man pasand gaana lagayiye or uska volume loud rakhiye. Gaana shuru hote hi aapko bhi uske bol se bol mila kar loudly gaana hai. Jahan aapke or song ke bol match nahi karte wahan song ko rewind karke fir se play kariye. Isase aapko pta chal jayega ki aapne kahan galati ki hai.

6. Yaad karke gaane ki koshish kare

Ek baar jab aapko lagne lage ki aapne song ke bol or music ko puri tarh pakad liya hai to ise puri tarah yaad karne ki koshish kare.

Ye ek bada step hai jab aapko gaana puri tarah yad ho jaye to  ise sune, dekhe or padhe bina gaana start kariye. Ek baat ko dhyan me rakhna hai ki aap ka target gaana nahi hai balki English bolna hai. Isliye is song ke words ko alag alag samajhna or yaad rakhna hai.

7.  Last step- Songs ke words ko apni daily life me use karna start kare

Ye last or sabse bold step hai aapko songs ke bol me aane wale words ko apni bolchal ke dauran use karna hai. Isme sabse badi or achi baat ye hai ki singing ke time par jo word aapke mind me ek scene create karte the wo aapko simple using me easy lagenge. Kyoki aapke mind me wo ek tasveer ki tarah baith chuke hote hain. Matlab aapko aise word aapke bolchal me aate hi primary or secondary language ki problem nahi rah jati or automatic aapke mind me iski image create hone lagti hai.


Songs or music ki help kyo le

• Aap tab tak kuch bhi nahi sikh sakte jab tak aapke andar use sikhne ki ichcha nahi paida hoti. Jab baat language ki aati hai to aapka interest hona jaruri hota hai. Koi bhi nayi language sikhne me man isliye nahi lagta kyoki ye usase jude words sunane ka aadi nahi hota. Sabse pahle aapko apne mind or man ko iska aadi bnana padega. Jisme songs or music aapki puri help karte hain.

• Language ke sath culture bhi juda hota hai. Ek bar aap kisi culture me involve ho gaye to language sikhna aapki jarurat nahi balki pleasure ka ek jariya ban jayega. Ye kaam us culture se related song hi kar sakte hai.

• Language me purity tabhi aati hai jab aap use sunane or bolne ke sath feel bhi karte hain. Feel karne ke liye aapko sikhne wali chij se upar uthna padega. Songs aapko language ki har feeling har emotions ka taste dete hain.

• Songs ki help se aap English sound ke sath jyada familiar ho sakte hai. Words ke pronounciation me clearity aayegi. Har word ki rythm beat or tone ki jankari aapki speaking improve karne me helpful hogi.

• Song me kuch word or sound pettern bar bar repeat hote hain. Is type ke pettern aako sunte sunte hi samajh aa jate hai. Ye words aap apni daily life me sunte hain bhi honge. Lekin jab ye aapke mind me pahle se hote hain to aap unhe easily catch karne lagte hain.

• Aap daily speaking ke liye study karte hain to song sunana aapke liye beneficial hoga. Ye bhi aapki study ka hissa hai. Aap office, ghar ya park kahi bhi ho, agar aapne din me kuch ghante English song sunane me spend kiye hain to aapne apni 50% study kar li hai.

English ki boriyat door ho gayi to aap apne aap ise sikh jayenge. Or boriyat door karne ka sabse acha tarika bas yahi hai ki aap Ise sikhne ke liye songs or music ka istmaal kare. Abhi or bhi aise tarike hain jo aapki boriyat ko door kar sakte hain. Filhaal agar aapko lagta hai ki ye aapke liye helpful ho sakta hai to abhi se start kar dijiye. Aapko success jarur milegi.